Procesorët e kompanisë VIA në OLPC

OLPC (One Laptop per Child) ka njoftuar se në versionin e ri të laptopëve XO do të largohet nga procesori Geode i kompanisë AMD. Si zëvendësim, do të përdoret ai C7-M i kompanisë VIA i cili punon në frekuencat prej 400 MHz deri në 1 GHz, varësisht nga ngarkesa.

Përveç procesorit të ri, XO do të pajiset me chipset të ri me përshpejtim 3D, mundësi të dekodimit të video materialeve high definition (HD) dhe me sistemin surround të zërimit. Kapaciteti i memories punuese do të rritet në 1 GB, derisa hapësira e diskut në 4 GB apo, si opsion, në 8 GB. Po ashtu është paralajmëruar edhe përmirësimi i ndriçimit të paraqitjes në ekran.

Përdorimi i komponentëve të ri do të mundësoi çmimin më të ulët për përdoruesit. Prototipat e parë pritet të paraqiten gjatë muajit gusht.